Veahkkebálvalus sápmelaččaide

Giellaválljen

Sámi

Dárogiella

Ruoŧagiella

Sámegielat veahkkebálvalus

Girku SOS lea veahkkebálvalus sápmelaččaide olles Sámis. Bálvalus lea buohkaide geat dárbbašit geainna nu ságastit, ja lea álo muhtin geas lea sámi kulturáddejupmi ja ipmirda sámegiela guhte vástida du. Dát bálvalus lea nuvttá ja namaheapmin, ja sáhtát váldit oktavuođa min neahttasiiddu dahje áppa´a bokte čálalaččat.

Don guhte válddát oktavuođa mearridat man birra ságastalat minguin. Ovdamearkkat ságastallamii sáhttet leat earret eará árgabeaihástalusat, oktonasvuohta ja hearkkes dilli, psyhkalaš gillámuš, iešsorbmenjurdagat, dahje eará hástalusat eallimis. Don válljet čálát go davvi-sámegillii, dárogillii dahje ruoŧa gillii.

Girku SOS guldala ja vástida buohkaid beroškeahttá seksuála sojus, čearddalašvuođas, sohkabealidentitehtas dahje oskkus.

Oktavuohta

Gii vástida?

Sii guhte vástidit du, leat min davvi-sámegielat eaktodáhtolaččat geat dovdet sámi kulturduogáža, ja leat válljejuvvon ja oahpahuvvon Girku SOS:s. Don guhte válddát oktavuođa bisut namaheapmin, ja son guhte vástida du lea maid namaheapmin ja sus lea jávohisgeatnegasvuohta.

Mo doaibmá?

Veahkkelinnjá sáhttá čilget dego namakeahtes e-poastabálvalussan. Bálvalussii sáhtát čállit goas háliidat, ja oažžut vástádusa 48 diimmus, ja dát doaibmá dego reivečállin geainna nu gii dovdá sámi kultuvrra, muhto ii dovdda du. Don leat guovddážis ságastallamis, ja oaččut veahki čilget dovdduidat.

Gii doaimmaha veahkkebálvalusa?

Norgga Kirkens SOS jođiha Girku SOS, ja doaimmaheapmi lea ovttasbargu gaskkal Norgga Kirkens SOS ja Ruoŧa Kyrkans SOS.

Veahkkebálvalusa ulbmil:

Buoret álbmotdearvvašvuohta ja iešsorbmeneastadeapmi Sámi ássiide.

Iešsorbmenlohku Sámi álbmogis lea mearkkašahtti alladat go muđui Skandinavias. Girku SOS háliida danin searvat veahkkálagaid buoredit álbmotdearvvašvuođa ja bargat iešsorbmeneastademiin olles Sámis.

52% doarjjaohcciin leat iešsorbmenjurdagat

Ođđajagimánu 1. Beaivvi 2024 rájes leat doarjjaohccit dađistaga lassánan, muhto maŋŋil go min mobiilaáppa almmuhuvvui Skábmamánu 2024 lassánedje doarjjaohccit sakka. Álgomuttus Miessemánu 1. Beaivvi 2025 rádjai vástidedje min eaktodáhtolaččat sullii 200 namakeahtes e-poasttaid, ja dain albmanahtte 52% iešsorbmenjurdagiid/ plánaid. Vaikko doarjjaohccit leat namaheamit, de orui leamen nu ahte sii geat válde oktavuođa ledje nuorra olbmot gaskkal 14 ja 30 jagi.

Eahpedáhtolaš oktonasvuohta

Álbmotdearvvašvuođaeiseválddit čuoččuhit ahte eahpedáhtolaš oktonasvuohta lea álbmotdearvvašvuođaváttisvuohta. Dat dagaha ahte fysalaš ja psyhkalaš buozalmasvuohta ja ovdaláigge jápminvárra lassána. Ássat bálddalaga eanetloguservodagain buktá dasa lassin liige hušša.

Unnitloguhušša

Unnitloguhušša, mii dávjá namuhuvvo LHBTQIA+-olbmuid rašesvuođa oktavuođas, lea jáhkkimis maiddái oassin sámiid árgabeaivvis. Unnitloguhušša mielddisbuktá bissovaš huššalassáneami heajos vásáhusaid geažil, nugo ovdamearkka dihte vealaheapmi ja heađušteapmi, danin go olmmoš gullá dihto unnitlogujovkui. Maiddái politihkalaš mearrádusat mat gusket eatnamiidda, dálkkádatrievdamiidda jna., váikkuhit sápmelaččaid ja dagahit liige noađi.

Mo sáhttá doarjjatelefovdna veahkehit?

Go ražat, vásihat doaivvuhisvuođa dahje massát eallinmovtta, de dovddat dávjá iežat áibbas okto. Rahpasit lagasolbmui sáhttá maid leahkit váttisin. Jus vel dasa lassin heahpanattat dovdat lossamiela, de dovddat maiddái iežat hui okto. Oktonasvuođa maid doalahat iežat siste. Ságastallat muhtimiin áibbas namakeahttá sáhttá de leat mearrideaddji. Mii diehtit ahte addá erenoamáš oadjebasvuođadovddu dan dahkat muhtimiin geas maid lea sámi kulturduogáš ja ipmirda sámi eallinvuogi. Danin álggahuvvui Girku SOS.

Sii geat váldet minguin oktavuođa duođaštit ahte min doarjjabálvalus veahkeha sin daid beivviid čađa go lossa jurdagat bohtet.

Guođe kommentára Girku SOS:i

Leat go gulahallan Girku SOS:in dahje min doarjjabálvalusain ja dus leat cealkámušat/kommentárat? De sáhtát čálistit daid Girku SOS namakeahtes oktavuođaskovi bokte.